பெங்களூருவைச் சேர்ந்த தேவைக்கேற்ப வீட்டு சேவைகளை வழங்கும் 'ஸ்னாபிட்' (Snabbit) நிறுவனம், தற்போது ஒரு நாளில் 1,15,000-க்கும் அதிகமான சேவைகளை வெற்றிகரமாக நிறைவேற்றி வருவதாக அறிவித்துள்ளது.
இந்த சாதனை, தேவைக்கேற்ப வழங்கப்படும் வீட்டு சேவைகளுக்கான வாடிக்கையாளர் தேவை தொடர்ந்து அதிகரித்து வருவதையும், நிறுவனம் தனது செயல்பாடுகளை விரிவுபடுத்தியபோதும் நிதி ஒழுங்கை மேம்படுத்தி வருவதையும் பிரதிபலிப்பதாக நிறுவனம் தெரிவித்துள்ளது.
சில மாதங்களுக்கு முன்புதான் தினசரி 50,000 சேவைகளையும், மாதத்திற்கு 10 லட்சம் சேவைகளையும் கடந்ததாக அறிவித்திருந்த நிலையில், தற்போது புதிய மைல்கல்லை எட்டியுள்ளது.
நிறுவனத்தின் அறிக்கையின்படி, இரண்டு ஆண்டுகளுக்கும் குறைவான காலத்தில் தினசரி சுமார் 400 சேவைகளிலிருந்து 1,15,000-க்கும் மேற்பட்ட சேவைகள் வரை வளர்ச்சி கண்டுள்ளது. இதனுடன், தனது செயல்பாடுகளை 10 நகரங்களுக்கும் 150-க்கும் மேற்பட்ட மைக்ரோ மார்க்கெட்டுகளுக்கும் விரிவுபடுத்தியுள்ளது.
வீட்டு சுத்தம், பாத்திரம் கழுவுதல், துணி துவைத்தல், சமையலுக்கான முன்தயாரிப்பு, வீட்டுச் சமையல்காரர்கள் மற்றும் வீட்டிற்கே வந்து வழங்கப்படும் அழகுப் பராமரிப்பு சேவைகள் உள்ளிட்ட பல்வேறு சேவைகளை ஸ்னாபிட் தற்போது வழங்கி வருகிறது.
ஒவ்வொரு பரிவர்த்தனையிலும் நிறுவனம் லாபமா அல்லது இழப்பா அடைகிறது என்பதை அளவிடும் 'யூனிட் எகானமிக்ஸ்' (Unit Economics) குறியீட்டிலும் முன்னேற்றம் ஏற்பட்டுள்ளதாக நிறுவனம் தெரிவித்துள்ளது.
நிறுவனத்தின் தகவலின்படி, தள்ளுபடிகளுக்குப் பிறகு கணக்கிடப்படும் ஒருங்கிணைந்த நிகர ஆர்டர் மதிப்பு (Net Order Value) நடப்பு நிதியாண்டின் முதல் காலாண்டில் ரூ.130-ஐ கடந்துள்ளது. மேலும், ஒவ்வொரு சேவையிலும் ஏற்பட்ட இழப்பு முந்தைய காலாண்டுடன் ஒப்பிடும்போது ரூ.100-க்கும் அதிகமாகக் குறைந்து, ஒரு சேவைக்கான இழப்பு ரூ.250-க்கும் கீழ் வந்துள்ளது.
வீட்டுச் சமையல்காரர்கள் மற்றும் வீட்டிற்கே வந்து வழங்கப்படும் அழகுப் பராமரிப்பு சேவைகள் போன்ற புதிய பிரிவுகளுக்கும் வாடிக்கையாளர்களிடையே நல்ல வரவேற்பு கிடைத்து வருவதாக நிறுவனம் தெரிவித்துள்ளது.
இந்தியாவில் நகர்ப்புற மக்கள் அன்றாட வீட்டு வேலைகளுக்காக செயலிகளை அதிகமாக பயன்படுத்தத் தொடங்கியுள்ள நிலையில், விரைவு வீட்டு சேவைச் சந்தை வேகமாக வளர்ச்சி பெற்று வருகிறது. அதே நேரத்தில், இத்துறையில் செயல்படும் நிறுவனங்கள் விரைவான விரிவாக்கத்தையும் லாபகரமான செயல்பாட்டையும் சமநிலைப்படுத்த முயற்சி செய்து வருகின்றன.
வீட்டு சேவைத் துறையில் போட்டியும் தீவிரமடைந்துள்ளது. அர்பன் கம்பெனி (Urban Company), ப்ரோன்டோ (Pronto) உள்ளிட்ட நிறுவனங்கள் உடனடி வீட்டு சேவைகளை விரிவுபடுத்துவதில் தீவிர முதலீடு செய்து வருகின்றன. வாடிக்கையாளர்களைப் பெறுவதற்கான செலவுகள் மற்றும் சேவை நிபுணர்களுக்கான ஊக்கத்தொகைகள் அதிகமாக இருந்தபோதிலும், முதலீட்டாளர்கள் இந்தத் துறையில் தொடர்ந்து முதலீடு செய்து வருகின்றனர்.
இந்த ஆண்டின் மே மாதத்தில் ப்ரோண்ட்டோ புதிய முதலீட்டை பெற்றது. இதேபோல், ஸ்னாபிட் நிறுவனம் ஏப்ரல் மாதத்தில் சீரிஸ் டி (Series D) சுற்றில் 5.6 கோடி அமெரிக்க டாலர் முதலீட்டை திரட்டி, இதுவரை பெற்ற மொத்த முதலீட்டை சுமார் 11.2 கோடி அமெரிக்க டாலராக உயர்த்தியுள்ளது. இந்த முதலீடு தொழில்நுட்ப மேம்பாடு, தற்போதுள்ள மற்றும் புதிய சந்தைகளில் விரிவாக்கம், மேலும் சேவை வழங்குநர்களின் அனுபவத்தை மேம்படுத்த பயன்படுத்தப்படும் என நிறுவனம் தெரிவித்துள்ளது.