ஹோம்

Stock News: பேரிழப்புக்குப் பின் மீளும் இந்திய பங்குச் சந்தை - காரணம் என்ன?

மத்திய கிழக்கு நாடுகளில் போர் பதற்றம் தணியாதது, கச்சா எண்ணெய் விலை உயர்வு, ரூபாய் மதிப்பு வீழ்ச்சி உள்ளிட்ட காரணங்களால் சர்வதேச அளவில் பங்குச் சந்தை வர்த்தகம் பாதித்துள்ளது. எனினும், உள்நாட்டு காரணிகளால் இந்திய பங்குச் சந்தை மீளத் தொடங்கியுள்ளது.

01:17:57 pm - May 13, 2026 | Jai s

சர்வதேச நிலவரம் இன்னமும் மோசமானதாக இருந்தாலும் கூட, உள்நாட்டு காரணிகளால் இந்திய பங்குச் சந்தையில் மீட்சிப் போக்கு நிலவுகிறது. தங்கம் மீதான சுங்க வரியை 15% ஆக மத்திய அரசு உயர்த்தியதும் கவனிக்கத்தக்கது.

இந்திய பங்குச் சந்தையில் செவ்வாய்க்கிழமை கடும் வீழ்ச்சி ஏற்பட்டது. வர்த்தக முடிவில் சென்செக்ஸ் 1,456 புள்ளிகள் சரிந்து 74,559-ல் நிலை பெற்றது. இதன்மூலம் முதலீட்டாளர்களுக்கு நேற்று ஒரே நாளில் ரூ.10.14 லட்சம் கோடி இழப்பு ஏற்பட்டதாக மதிப்பிடப்பட்டது.

மும்பை பங்குச் சந்தையில் இன்று (மே 13) காலையில் வர்த்தகம் தொடங்கும்போது சென்செக்ஸ் 75.64 புள்ளிகள் உயர்ந்து 74,614.51 ஆக இருந்தது. அதேவேளையில், தேசிய பங்குச் சந்தையில் நிஃப்டி 17.10 புள்ளிகள் உயர்ந்து 23,391.10 ஆக இருந்தது. பின்னர் சரிந்து உடனடியாக மீண்டது.

“மத்திய கிழக்கு நாடுகளில் போர் பதற்றம் தணியாதது, கச்சா எண்ணெய் விலை உயர்வு உள்ளிட்ட காரணங்களால் சர்வதேச அளவில் பங்குச் சந்தை வர்த்தகம் பாதித்துள்ளது. எனினும், உள்நாட்டு காரணிகளால் இந்திய பங்குச் சந்தை மீளத் தொடங்கியுள்ளது,” என்று வர்த்தக நிபுணர்கள் கூறுகின்றனர்.

மும்பை பங்குச் சந்தையின் இன்றைய நண்பகல் வர்த்தகத்தில் அதானி போர்ட்ஸ், நெஸ்லே இந்தியா, கோடக் மஹிந்திரா பேங்க், ஆக்சிஸ் பேங்க், பாரதி ஏர்டெல், டாடா ஸ்டீல் உள்ளிட்ட நிறுவனப் பங்குகள் ஏற்றம் கண்டுள்ளன. டெக் மஹிந்திரா, இன்போசிஸ், டிசிஎஸ், சன் பார்மா, என்டிபிசி, எம் அண்ட் எம் உள்ளிட்ட நிறுவனப் பங்குகள் சரிவை சந்தித்தன.

இன்று பிற்பகல் 12.40 மணியளவில் சென்செக்ஸ் 239.58 புள்ளிகள் உயர்ந்து 74,798.82 ஆகவும், நிஃப்டி 80.40 புள்ளிகள் உயர்ந்து 23,459.95 ஆகவும் இருந்தது.

காரணம் என்ன?

அமெரிக்க பங்குச் சந்தை சரிவுடன் நிறைவுற்றது. ஆசிய பங்குச் சந்தைகளில் கலவையான் போக்கு நிலவுகிறது. மத்திய கிழக்கு நாடுகளில் போர் பதற்றம் தணியாதது, கச்சா எண்ணெய் விலை உயர்வு உள்ளிட்ட காரணங்களால் சர்வதேச அளவில் பங்குச் சந்தை வர்த்தகம் பாதித்துள்ளது. எனினும், உள்நாட்டு காரணிகளால் இந்திய பங்குச் சந்தை மீளத் தொடங்கியுள்ளது.