தமிழ்நாட்டின் புதிய வேளாண் பட்ஜெட் - செயற்கை நுண்ணறிவை வயல்வெளிக்கு கொண்டு வரும் புதிய முயற்சி!

இந்த ஆண்டு வெளியான இரண்டு முக்கிய ஆவணங்கள், தமிழ்நாட்டில் வேளாண் துறையில் செயற்கை நுண்ணறிவு (AI) சோதனை முயற்சியிலிருந்து அரசின் நிதியுதவி பெறும் திட்டமாக முன்னேறியிருப்பதை வெளிப்படுத்துகின்றன. அவை பிப்ரவரியில் வெளியிடப்பட்ட தமிழ்நாடு பொருளாதார ஆய்வறிக்கை மற்றும் ஆகஸ்ட் 6 அன்று தாக்கல் செய்யப்பட்ட வேளாண் பட்ஜெட் ஆகும்.

"சோதனைத் திட்டங்கள் காட்டிய முடிவுகள்"

2025–26ஆம் ஆண்டுக்கான தமிழ்நாடு பொருளாதார ஆய்வறிக்கை, பிப்ரவரி 16 அன்று வெளியிடப்பட்டது. அதில், 870 ஏக்கருக்கும் அதிகமான பரப்பளவில் மேற்கொள்ளப்பட்ட செயற்கை நுண்ணறிவு மற்றும் ட்ரோன் தொழில்நுட்பம் அடிப்படையிலான நெல் சாகுபடி சோதனைத் திட்டங்கள் 15 முதல் 20 சதவீதம் வரை விளைச்சல் உயர்வை ஏற்படுத்தியதாக தெரிவிக்கப்பட்டுள்ளது.

இந்த சோதனைத் திட்டங்களில், ட்ரோன்கள் மூலம் எடுக்கப்பட்ட வயல்வெளி படங்களையும், AI மாதிரிகளையும் பயன்படுத்தி பயிர்களை கண்காணித்து, பூச்சித் தாக்குதல்களை ஆரம்ப நிலையிலேயே கண்டறியும் முறை பின்பற்றப்பட்டது.

இந்த முயற்சி, ‘தமிழ்நாடு AI திட்டப்பணி’ (Tamil Nadu AI Mission)யின் ஒரு பகுதியாக மேற்கொள்ளப்பட்டது. இதன் கீழ், வேளாண்மை, கல்வி மற்றும் போக்குவரத்து மேலாண்மை ஆகிய துறைகளுக்காக 100-க்கும் மேற்பட்ட தரவுத் தொகுப்புகளை கொண்ட திறந்த AI தரவு தளம் உருவாக்கப்பட்டு வருகிறது. இதற்காக முதல் இரண்டு ஆண்டுகளில் ரூ.14 கோடி ஒதுக்கப்பட்டுள்ளது. எனினும், இந்த நிதி வேளாண்மைக்காக மட்டும் அல்ல; மூன்று துறைகளுக்கான தரவு உள்கட்டமைப்பு மேம்பாட்டிற்கான ஒதுக்கீடாகும்.

இதற்கு முன்பு, பிப்ரவரியில் அப்போதைய வேளாண் அமைச்சர் எம்.ஆர்.கே. பன்னீர்செல்வம் தாக்கல் செய்த இடைக்கால வேளாண் பட்ஜெட்டில், வேளாண் துறைக்காக ரூ.47,248 கோடி ஒதுக்கப்பட்டிருந்தது. இது முந்தைய ஆண்டின் ரூ.45,661 கோடியை விட அதிகமாகும்.

"ஆகஸ்ட் பட்ஜெட்டில் நிதி ஒதுக்கப்பட்ட திட்டங்கள்"

ஆகஸ்ட் 6 அன்று வேளாண் அமைச்சர் ஆர்.வினோத் தாக்கல் செய்த 2026–27 வேளாண் பட்ஜெட்டில், 'உழவர் AI' (Uzhavar AI) என்ற புதிய திட்டம் அறிமுகப்படுத்தப்பட்டு, அதற்காக ரூ.2 கோடி ஒதுக்கப்பட்டுள்ளது.

இந்தத் திட்டத்தின் நோக்கம், வேளாண் விரிவாக்கப் பணிகளில் செயற்கை நுண்ணறிவும் இயந்திரக் கற்றலும் (Machine Learning) பயன்படுத்தப்படுவதை உறுதி செய்வதாகும். இதன் மூலம், பயிர் சாகுபடியின் முழு காலகட்டத்திலும் விவசாயிகளுக்கு பின்வரும் ஆலோசனைகள் வழங்கப்படவுள்ளன:

• உள்ளூர் வானிலை முன்னறிவிப்பு
• மண் வளம் மற்றும் உரச்சத்து குறித்த தகவல்கள்
• பூச்சி மற்றும் நோய் பரவல் குறித்த முன்எச்சரிக்கை
• அந்தந்த பகுதியின் வேளாண்-காலநிலைச் சூழலுக்கு ஏற்ற பயிர் பரிந்துரைகள்

இதனுடன், "குரல் வழி வேளாண் சேவைகள்" (Voice-First Agriculture Services) என்ற புதிய சேவையும் அறிமுகப்படுத்தப்படுகிறது. இதில், தட்டச்சு செய்யத் தேவையில்லாமல், குரல் மூலம் விவசாயிகள் ஆலோசனைகள், சந்தை விலை விவரங்கள் மற்றும் அரசுத் திட்டங்கள் பற்றிய தகவல்களைப் பெற முடியும்.

குறிப்பாக தட்டச்சு செய்வதில் சிரமம் உள்ள விவசாயிகளுக்கு இந்த சேவை முக்கிய மாற்றத்தை ஏற்படுத்தும் என எதிர்பார்க்கப்படுகிறது.

மேலும், தமிழ்நாடு வேளாண் பல்கலைக்கழகத்தின் (TNAU) தொலைநிலை விமானி பயிற்சி மையம் (Remote Pilot Training Organisation) மூலம் 100 பெண்கள் உட்பட 500 பேருக்கு ட்ரோன் இயக்குநர் பயிற்சி வழங்க ரூ.1.50 கோடி ஒதுக்கப்பட்டுள்ளது.

பயிற்சி பெற்ற 50 பெண்களுக்கு ட்ரோன்கள் வாங்க மானியமாக ரூ.2.50 கோடி வழங்கவும் பட்ஜெட்டில் அறிவிக்கப்பட்டுள்ளது.

ஏற்கனவே நடைமுறையில் உள்ள வசதிகள்

தமிழ்நாடு அரசின் 'உழவன்' செயலியில் (Uzhavan App), தமிழ்நாடு மின்னணு ஆளுமை முகமை (Tamil Nadu e-Governance Agency) உடன் இணைந்து உருவாக்கப்பட்ட AI அடிப்படையிலான பூச்சி அடையாளம் காணும் வசதி ஏற்கனவே செயல்பாட்டில் உள்ளது.

இதில், விவசாயிகள் பாதிக்கப்பட்ட பயிரின் புகைப்படத்தை பதிவேற்றினால், AI அந்தப் பூச்சியை அடையாளம் கண்டு தமிழிலேயே உரிய ஆலோசனைகளை வழங்குகிறது.

இது இந்த ஆண்டின் எந்தப் பட்ஜெட்டிலும் புதிதாக அறிவிக்கப்பட்ட திட்டம் அல்ல. ஆரம்பகட்ட நோய் அல்லது பூச்சி தாக்குதலை விரைவாக கண்டறிய உதவினாலும், புகைப்படங்கள் தெளிவாக இல்லாதபோது அல்லது பல பூச்சிகளின் அறிகுறிகள் ஒரே மாதிரியாக இருக்கும் சூழலில், இது வேளாண் அலுவலர்களின் ஆலோசனைக்கு மாற்றாக அல்ல; துணை கருவியாக மட்டுமே பயன்படுத்தப்பட வேண்டும்.

தேசிய அளவிலான முன்னெடுப்பு

2026–27 ஒன்றிய பட்ஜெட்டில் அறிவிக்கப்பட்ட 'பாரத்-விஸ்தார்' (Bharat-VISTAAR) என்ற பன்மொழி AI தளத்திற்கு, இந்த ஆண்டுக்காக ரூ.150 கோடி ஒதுக்கப்பட்டுள்ளது.

AgriStack தளங்களையும், இந்திய வேளாண் ஆராய்ச்சி கவுன்சிலின் (ICAR) பயிர் மேலாண்மை வழிகாட்டுதல்களையும் ஒருங்கிணைக்கும் இந்தத் திட்டத்தை, ஒன்றிய வேளாண் அமைச்சர் சிவராஜ் சிங் சவுகான், பிப்ரவரி 17 அன்று ஜெய்ப்பூரில் தொடங்கி வைத்தார்.

முதல் கட்டமாக, இந்த சேவை இந்தி மற்றும் ஆங்கில மொழிகளில், தொலைபேசி அழைப்பு மற்றும் சாட்பாட் (Chatbot) வழியாக செயல்பட்டு வருகிறது. மகாராஷ்டிரா, பீகார், குஜராத் உள்ளிட்ட மாநிலங்களில் இது பயன்பாட்டில் உள்ளது.

ஆனால், தமிழ்நாட்டின் டிஜிட்டல் வேளாண் தளங்கள் இந்த தேசிய அமைப்புடன் இணைக்கப்படும் என்ற அறிவிப்பு இதுவரை வெளியாகவில்லை.

இந்தக் கேள்வி முக்கியமானது. ஏனெனில், மகாராஷ்டிராவின் MahaVISTAAR-AI தளம் சுமார் 25 லட்சம் விவசாயிகளை சென்றடைந்துள்ளதாக தகவல்கள் தெரிவிக்கின்றன. இந்த அளவிலான விரிவாக்கத்தை தனித்து செயல்படும் மாநில செயலிகள் விரைவாக அடைவது சவாலாகக் கருதப்படுகிறது.

உண்மையான சவால்

ரூ.2 கோடி ஒதுக்கீடு, மாநிலம் முழுவதும் செயல்படும் திட்டத்திற்கான முழுமையான நிதி அல்ல; ஆரம்ப கட்ட பதிப்பை உருவாக்குவதற்கான முதலீடாகும்.

இந்தத் திட்டத்தின் வெற்றி, பட்ஜெட் ஒதுக்கீட்டை விட வேறு காரணிகளைப் பொறுத்தே அமையும். குறிப்பாக:

• உள்மாவட்டங்களில் இணைய இணைப்பு வசதி

• பாரம்பரிய விவசாய முறைகளை விட AI வழங்கும் பரிந்துரைகளை விவசாயிகள் நம்பும் மனப்பான்மை

• தொடக்ககட்டத்தில் விவசாயிகளுக்கு நேரடியாக வழிகாட்டும் உள்ளூர் நிபுணர்கள்

இவை அனைத்தும் திட்டத்தின் வெற்றியை நிர்ணயிக்கும் முக்கிய அம்சங்களாக இருக்கும்.

இதனை ஆதரிக்கும் வகையில், Discover Agriculture இதழில் 2025ஆம் ஆண்டு வெளியான ஒப்பீட்டு ஆய்வும், உள்ளூர் நிறுவனங்கள், மாற்றத்தை முன்னெடுக்கும் சமூக முன்னோடிகள், தகவல் தொடர்பு (ICT) உள்கட்டமைப்பு மற்றும் உள்ளூர் தேவைகளுக்கேற்ற தகவல் உள்ளடக்கம் ஆகியவை இருந்தால்தான் டிஜிட்டல் காலநிலை-சார் வேளாண் சேவைகளை விவசாயிகள் அதிகமாக ஏற்றுக்கொள்வதாகக் கூறுகிறது.

மேலும், AI வழங்கும் பரிந்துரைகளின் தரம், அதற்கு பயன்படுத்தப்படும் பயிர், வானிலை மற்றும் பூச்சி தொடர்பான தரவுகளின் துல்லியத்தைப் பொறுத்தே அமையும். அதேபோல், தங்களது விவசாயத் தரவுகள் எவ்வாறு பயன்படுத்தப்படுகின்றன என்பதையும் விவசாயிகள் அறிந்திருக்க வேண்டியது அவசியமாகும்.

870 ஏக்கர் பரப்பளவில் கிடைத்த விளைச்சல் உயர்வு உறுதியான ஆதாரமாக இருந்தாலும், அதை மாநிலம் முழுவதும் வெற்றிகரமாக விரிவுபடுத்துவது மென்பொருள் சார்ந்த சவால் அல்ல; வயல்வெளியில் செயல்படுத்த வேண்டிய நடைமுறைச் சவாலாகும்.