ஹோம்

Stock News: பங்குச் சந்தையில் தடுமாற்றம் - ‘அடிவாங்கிய’ பங்குகள் எவை?

இன்று ஏறிய வேகத்தில் இறங்கத் தொடங்கிய இந்திய பங்குச் சந்தை வர்த்தம் அதன்பின் நிலையின்றி ஏற்றமும் இறக்கமுமாக தடுமாறி வருகிறது.

01:54:45 pm - Aug 12, 2025 | Jai s

இந்திய பங்குச் சந்தையில் நேற்று ஏற்றம் நிலவிய சூழலில், இன்று மீண்டும் தடுமாற்றம் தொற்றிக் கொண்டது. ஏற்றமும் இறக்கமுமாக மாறி மாறி இருப்பது முதலீட்டாளர்களை கலக்கத்தில் ஆழ்த்தியுள்ளது.

மும்பை பங்குச் சந்தையில் இன்று (ஆக.12) காலை வர்த்தகம் தொடங்கும்போது சென்செக்ஸ் 66.28 புள்ளிகள் உயர்ந்து 80,670.36 ஆக இருந்தது. அதேவேளையில், தேசிய பங்குச் சந்தையில் நிஃப்டி 42.85 புள்ளிகள் உயர்ந்து 24,627.90 ஆக இருந்தது.

எனினும், ஏறிய வேகத்தில் இறங்கத் தொடங்கிய இந்திய பங்குச் சந்தை வர்த்தம் அதன்பின், நிலையின்றி ஏற்றமும் இறக்கமுமாக தடுமாறி வருகிறது. மாருதி சுசுகி, டெக் மஹிந்திரா, எம் அண்ட் எம், டாடா ஸ்டீல், ஹெச்சில் டெக்னாலஜிஸ், என்டிபிசி, எல் அண்ட் டி உள்ளிட்ட நிறுவனப் பங்குகள் ஏற்றம் கண்டிருந்தன. ஐடிசி, ஏசியன் பெயின்ட்ஸ், அதானி போர்ட்ஸ், பஜாஜ் ஃபின்சர்வ், பாரதி ஏர்டெல் உள்ளிட்ட நிறுவனப் பங்குகள் இறக்கம் கண்டுள்ளன.

இன்று பிற்பகல் 1.15 மணியளவில் சென்செக்ஸ் 33.45 புள்ளிகள் உயர்ந்து 80,637.53 ஆகவும், நிஃப்டி 15.20 புள்ளிகள் உயர்ந்து 24,600.25 ஆகவும் இருந்தது.

காரணம் என்ன?

அமெரிக்க பங்குச் சந்தை வர்த்தகம் சரிவுடன் நிறைவு பெற்றது. ஆசிய பங்குச் சந்தைகளைப் பொறுத்தவரையில் டோக்கியோ, ஷாங்காய், சியோல் மற்றும் ஹாங்காங் என அனைத்திலும் ஏற்றம் நிலவுகிறது. ஆனால், இந்திய பங்குச் சந்தைகளில் ஏற்றமும் இறக்கமுமாக தடுமாற்றமே நிலவுகிறது. வெளிநாட்டு முதலீடுகளின் வரத்து குறைவதும் இதற்கு முக்கிய காரணம்.