நான்கு மாதங்களாக சம்பளம் வழங்கப்படாததால், புனேவில் உள்ள டாடா கன்சல்டன்சி சர்வீசஸின் சஹ்யாத்ரி பூங்கா அலுவலகத்திற்கு வெளியே நிறுவனத்தின் ஊழியர் ஒருவர் தூங்கிக்கொண்டிருப்பதாகக் குற்றம் சாட்டி, X-இல் ஒரு பதிவு ஆன்லைனில் சீற்றத்தைத் தூண்டியுள்ளது.
"பீயிங் புனேகர் அஃபிஷியல்" என்ற பக்கத்தால் முதலில் பகிரப்பட்ட இந்த வைரல் பதிவில், தன்னை சௌரப் மோர் என்று அடையாளப்படுத்திக் கொள்ளும் ஒரு நபர் கையால் எழுதிய குறிப்பாகும் இது.
அந்தக் குறிப்பில்,
ஜூலை 29, 2025 அன்று டிசிஎஸ் அலுவலகத்தில் பணிக்குத் திரும்பியதாகவும் ஆனால், தனது பணியாளர் ஐடி மற்றும் சிஸ்டம் அணுகல் முடக்கப்பட்டதாகவும் கூறியுள்ளார். ஜூலை 31 ஆம் தேதிக்குள் அவரது சம்பளம் வரவு வைக்கப்படும் என்று மனிதவளத் துறை உறுதியளித்த போதிலும், அதுவரை எந்தப் பணமும் செலுத்தப்படவில்லை என்று குற்றம் சாட்டிப் பதிவிட்டுள்ளார்.
"என்னிடம் பணம் இல்லை என்றும், TCS-க்கு வெளியே நடைபாதையில் தூங்கவும் வாழவும் கட்டாயப்படுத்தப்படுவேன் என்றும் HR-க்குத் தெரிவித்துள்ளேன். HR அதற்கு பதிலளிக்கவில்லை. எனவே, நான் ஜூலை 29, 2025 முதல் TCSக்கு முன்னால் நடைபாதையில் வசித்து வருகிறேன்," என்று அந்தக் கடிதத்தில் குறிப்பிடப்பட்டுள்ளது.
இந்தப் பதிவு விரைவாகப் பிரபலமடைந்து வருகிறது, பல பயனர்கள் ஊழியரின் இந்த நிலைமை குறித்து கருத்து தெரிவித்து வருகின்றனர். ஒரு பயனர் எழுதும் போது,
“இந்த காட்சியை நானே நேரில் கண்டேன். நான் பாதுகாப்புக் காவலர்களிடம் கேட்டேன், நேற்று இரவு முதல் அவர் சாலையில் தூங்கிக்கொண்டிருப்பதை அவர்கள் உறுதிப்படுத்தினர். நான்கு மாதங்களாக அவருக்கு சம்பளம் கிடைக்கவில்லை என்று அவர் கூறினார். மனிதவள அதிகாரியைச் சந்தித்த பிறகும், பிரச்சினை தீர்க்கப்படாமல் உள்ளது,” என்று நிலைமையை உறுதி செய்தார்.
தற்போதைய நிலவரப்படி, இந்த சம்பவம் குறித்து TCS எந்த அதிகாரப்பூர்வ அறிக்கையையும் வெளியிடவில்லை. அந்த நபரின் வேலைவாய்ப்பு நிலை மற்றும் அவரது கூற்றுக்கள் உண்மைதானா என்பதும் சரிபார்க்கப்படவில்லை, இதனால் பல கேள்விகளுக்கு விடை கிடைக்காமல் உள்ளது.
இந்த சம்பவம் சம்பள தாமதங்கள், ஊழியர்களின் நல்வாழ்வு, நிதியளவில் உறுதியற்ற நிலை எவ்வாறான விளைவுகளை ஏற்படுத்தும் என்பது பற்றிய உரையாடல்களைக் கிளப்பியுள்ளது. டிசிஎஸ் நிறுவனம் இது தொடர்பாக வெளிப்படையாகப் பதிலளித்து நிலைமையை தெளிவுபடுத்துமாறு வலியுறுத்துகின்றனர்.
தொகுப்பு: முத்துகுமார்
