ஹோம்

Stock News: ட்ரம்ப் மிரட்டல் எதிரொலி - சென்செக்ஸ், நிஃப்டி புள்ளிகள் சரிவு!

01:04:18 pm - Aug 05, 2025 | Jai s

இந்திய பங்குச் சந்தை வர்த்தகம் நேற்று மீண்டெழுந்த நிலையில், இன்று மீண்டும் கடும் சரிவுக்கு உள்ளாகி இருக்கிறது. சென்செக்ஸ், நிஃப்டி புள்ளிகள் வெகுவாக சரிந்து வருகின்றன.

மும்பை பங்குச் சந்தையில் இன்று (ஆக்.5) காலை வர்த்தகம் தொடங்கும்போது சென்செக்ஸ் 315.03 புள்ளிகள் உயர்ந்து 80,703.69 ஆக இருந்தது. அதேவேளையில், தேசிய பங்குச் சந்தையில் நிஃப்டி 41.80 புள்ளிகள் உயர்ந்து 24,680.95 ஆக இருந்தது.

இந்தியாவுக்கு வர்த்தக ரீதியில் ட்ரம்ப் விடுத்துள்ள புதிய மிரட்டல் உள்ளிட்ட காரணங்களால், இந்திய பங்குச் சந்தையில் கடும் சரிவு நிலவுகிறது. குறிப்பாக, எண்ணெய் நிறுவனப் பங்குகள் கடும் வீழ்ச்சி கண்டுள்ளன. பெல், ஹெச்டிஎஃப்சி பேங்க், ரிலையன்ஸ் இண்டஸ்ட்ரீஸ், இன்போசிஸ், அதானி போர்ட்ஸ், டாடா ஸ்டீல் உள்ளிட்ட நிறுவனப் பங்குகள் இறக்கம் கண்டுள்ளன. எனினும், இண்டஸ்இண்ட் பேங்க், டைடன் கம்பெனி, மாருதி சுசுகி, எஸ்பிஐ, பாரதி ஏர்டெல் உள்ளிட்ட நிறுவனப் பங்குகள் ஏற்றம் கண்டுள்ளன.

இன்று பிற்பகல் 1 மணியளவில் சென்செக்ஸ் 292.31 புள்ளிகள் சரிந்து 80,726.41 ஆகவும், நிஃப்டி 88.95 புள்ளிகள் சரிந்து 24,633.80 ஆகவும் இருந்தது.

காரணம் என்ன?

அமெரிக்க பங்குச் சந்தை வர்த்தகம் ஏற்றத்துடன் நிறைவு பெற்றது. ஆசிய பங்குச் சந்தைகளைப் பொறுத்தவரையில் டோக்கியோ, சியோல், ஹாங்காங் மற்றும் ஷாங்காங் என அனைத்திலும் ஏற்றம் நிலவுகிறது. ஆனால், இந்திய பங்குச் சந்தை மட்டும் சரிவை சந்தித்துள்ளது.

ரஷ்யாவிடம் கச்சா எண்ணெய் இறக்குமதி செய்தால் கூடுதல் வரியுடன் அபராதம் விதிக்கப்படும் என்று அமெரிக்க அதிபர் ட்ரம்ப் புதிய மிரட்டல் விடுத்துள்ளார். இதனால், வெளிநாட்டு முதலீடுகளும் குறைந்துவிட்டன. இந்திய பங்குச் சந்தையில் சரிவுப் போக்கு நீடிக்கலாம் என அஞ்சப்படுகிறது.