ரிலையன்ஸ் இண்டஸ்ட்ரீஸ் நிறுவனத்தின் நுகர்வோர் சில்லரை விற்பனைப் பிரிவான ரிலையன்ஸ் ரீடெய்ல் ஹைப்பர் லோக்கல் டெலிவரி கூட்டாளி டன்சோவில் தனது ரூ.1565 கோடி முதலீட்டைத் தள்ளுபடி செய்துள்ளது. இத்தகவலை நிறுவனம் தனது ஆண்டறிக்கையில் குறிப்பிட்டுள்ளது.
கடுமையானப் போட்டிகள் நிறைந்த டோர் டெலிவரி துறையில் ஆரம்பத்திலேயே நுழைந்த டன்சோவினால் போட்டியில் நிற்க முடியவில்லை. இந்த ஆண்டு ஜனவரி மாதம், அதன் இணை நிறுவனர் மற்றும் தலைமை நிர்வாக அதிகாரி கபீர் பிஸ்வாஸ் நிறுவனத்தை விட்டு வெளியேறியதால், அதன் செயலி மற்றும் வலைத்தளம் ஆஃப்லைனில் சென்றதால், டன்சோ செயல்பாடுகளை நிறுத்தியது. பிஸ்வாஸும் ஃபிளிப்கார்ட்டில் இணைந்தார்.
கடந்த ஜனவரி 2022-ம் ஆண்டு துரித வர்த்தகத்தில் டன்சோவுடன் இணைந்தது ரிலையன்ஸ் ரீடெய்ல். இது லைட்பாக்ஸ், 3L கேபிடல், ஆல்டீரியா கேபிடல் ஆகியவற்றுடன் இணைந்து $240 மில்லியன் நிதி திரட்டும் சுற்றுக்கு வழிவகுத்தது. ரிலையன்ஸ் ரீடெய்ல் டன்சோவில் சுமார் 26% பங்குகளை வைத்திருந்தது. கூகிள் அதன் 19.3% பங்குகளையும், லைக்பாக்ஸ் அதன் 10% பங்குகளையும் மற்ற பெரிய முதலீட்டாளர்களுடன் சேர்த்துக் கொண்டது.
2014 ஆம் ஆண்டு நிறுவப்பட்ட இந்த புதிய ஸ்டார்ட் அப், 450 மில்லியன் டாலர்களுக்கு மேல் நிதி திரட்டியது. ஆரம்பத்தில் பயனர்களுக்கான ஹைப்பர்லோக்கல் வசதி தளமாக செயல்பட்ட இது, பின்னர் மளிகைப் பொருட்களை வழங்குவதில் கவனம் செலுத்தி, பின்னர் முழுமையான விரைவான வர்த்தக தளமாக மாறியது.
பணப்புழக்கம் அதிகமுள்ள துரித வர்த்தகத் துறை டன்சோவின் அடிமட்டத்தை அரித்து விட்டது. மீண்டும், மீண்டும் பணிநீக்கங்கள், செலுத்தப்படாத சம்பளம் என்று அடுத்தடுத்து டன்சோ சிக்கல்களைச் சந்தித்தது.
அதன் பின்னர், ரிலையன்ஸ் நிறுவனம் தனது மளிகைப் பொருட்களை மையமாகக் கொண்ட துரித வர்த்தக சேவைக்காக ஏற்கனவே உள்ள கடை வலையமைப்பைப் பயன்படுத்துவதில் கவனம் செலுத்தி வருகிறது. அதன் கடை வலையமைப்பு மூலம் சேவை செய்ய முடியாத இடங்களுக்கான டார்க் கடைகளையும் தீவிரமாக உருவாக்கி வருகிறது.