ஸ்டீவ் ஜாப்ஸ்-ன் ‘2 மணி நேர விதி’யால் வெற்றிக்கு வித்திடுவது எப்படி?

நம்மில் பலரும் தங்களுடைய அன்றாட வாழ்க்கையில் தொடர்ச்சியான பணிகளைக் கொண்டு நிரப்புகிறோம். ஆனால், வெற்றியின் ரகசியம் என்பது கடினமாக உழைப்பது மட்டும் அல்ல, மாறாக ஆழமாக சிந்திப்பதும் கூட என்று சொன்னால் நம்புவீர்களா? ஸ்டீவ் ஜாப்ஸ் அதைத்தான் நம்பினார்.

தொழில்நுட்ப உலகில் ஸ்டீவ் ஜாப்ஸ் ஒரு முன்னோடி மட்டுமல்ல. அவரது அபார திறனுக்குப் பின்னால் ஒரு வியக்கத்தக்க எளிமையான, அமைதியான அணுகுமுறை இருந்தது. அதுதான் ‘2 மணி நேர விதி’.

இந்த ‘2 மணி நேர விதி’யை ஆராய்ந்து, அது உங்கள் ஆக்கப்பூர்வமான புத்திசாலித்தனத்தை திறந்து, முடிவெடுக்கும் திறனை எப்படி கூர்தீட்டுகிறது என்று பார்ப்போம்.

ஸ்டீவ் ஜாப்ஸின் ‘2 மணி நேர விதி’ என்ன?

‘2 மணி நேர விதி’ என்பது தடையற்ற சிந்தனையில் ஆழமான வேரூன்றிய ஒன்று. ஸ்டீவ் ஜாப்ஸுக்கு நெருக்கமானவர்களின் கூற்றுப்படி, அவர் பெரும்பாலும் நீண்ட, திட்டமிடப்பட்ட நேரங்களை தனியாக நடப்பதற்கோ அல்லது ஆழ்ந்த சிந்தனையிலோ செலவிடுவார். இவை இடைவேளைகள் அல்ல, அவரது மனதுடன் கூடிய உத்தி ரீதியான அமர்வுகள்.

ஸ்டீவ் ஜாப்ஸ் பிரபலமான முறையில் கடினமான சிக்கல்களைப் பற்றி சிந்திக்கவும், கருத்துகளைச் செம்மைப்படுத்தவும், எதிர்காலத்தைக் கற்பனை செய்யவும் இந்த நீண்ட நடைப்பயிற்சிகளை பயன்படுத்தினார். சுமார் 2 மணிநேரம் வெறும் சிந்திப்பதற்காக மட்டுமே நடைப்பயிற்சி மேற்கொண்டார். கவனச்சிதறல்கள் இல்லை, சந்திப்புகள் இல்லை, மின்னஞ்சல்கள் என எதுவும் இல்லை.

இந்த ‘சிந்தனை நேரம்’ தான் ஸ்டீவ் ஜாப்ஸுக்கு புள்ளிகளை இணைக்கவும், கருத்துக்களை எளிமைப்படுத்தவும், வழக்கமான சிந்தனைகளை சவாலுக்கு உட்படுத்தவும் அனுமதித்தது. புதுமை பிறந்த இடம் இதுதான்.

சிந்தனை நேரம் ஏன் மேதைமையை வெளிக்கொண்டு வருகிறது?

பெரும்பாலான மக்கள் மின்னஞ்சல்கள், மீட்டிங் போன்றவற்றில் மிகவும் பிஸியாக இருக்கிறார்கள். ஆனால், மேதைமை என்பது எதிர்வினையாற்றுவது அல்ல. மாறாக, பிரதிபலிப்பது.

‘சிந்திக்கும் நேரம்’ எதையெல்லாம் உருவாக்குகிறது?

தெளிவு: இடைவெளி எடுத்துக் கொள்வது உங்கள் மனதை அன்றாட அவசரத்தில் கண்ணுக்குத் தெரியாத வடிவங்களை பார்க்க அனுமதிக்கிறது.

அசல் தன்மை: படைப்பாற்றலுக்கு மன அமைதி தேவை. தொடர் உள்ளீடுகள் உங்கள் குரலுக்கு இடமளிக்காது.

நுண்ணறிவு: நீங்கள் பரபரப்பில் சிக்கிக் கொள்ளாதபோது மட்டுமே ​​உங்களால் சிறந்த முன்னோக்கி செல்லும் பாதைகளைக் கண்டறிய முடியும்

வித்தியாசமான ஒன்றை உருவாக்க, வித்தியாசமாக சிந்திக்க வேண்டும் என்பதை ஸ்டீவ் ஜாப்ஸ் புரிந்துகொண்டார். வித்தியாசமாக சிந்திக்க நேரம் தேவை.

உங்கள் வாழ்க்கையில் ‘2 மணி நேர விதி’யை எவ்வாறு செயல்படுத்துவது?

‘2 மணி நேர விதி’யைப் பயன்படுத்த நீங்கள் ஸ்டீவ் ஜாப்ஸாக இருக்க வேண்டியதில்லை. அதை எவ்வாறு பயன்படுத்துவது என்பது இங்கே பார்க்கலாம்:

1. வாரந்தோறும் சிந்திக்கும் நேரத்தை திட்டமிடுங்கள்

உங்கள் காலண்டரில் வாரத்திற்கு ஒரு முறை அல்லது இரண்டு முறை இரண்டு மணி நேரங்களை ஒதுக்குங்கள். அதை ஓர் உயர் - முன்னுரிமை மீட்டிங் போல கருதுங்கள். போன் உள்ளிட்ட எல்லா சாதனங்களையும் அணைக்கவும். நடக்கச் செல்லுங்கள் அல்லது அமைதியான இடத்தில் அமருங்கள். தனிமை மிக முக்கியம்.

2. பெரிய கேள்விகளைக் கேளுங்கள்

உங்கள் சிந்தனை நேரத்தில் சக்திவாய்ந்த கேள்விகளை கேளுங்கள்:

> எனக்கு எந்தப் பிரச்சினை தெளிவாகத் தெரியவில்லை?

> இந்த யோசனையின் மிகவும் துணிச்சலான அம்சம் எது?

> வேகமாக முன்னேறிச் செல்ல நான் நீக்க வேண்டிய ஒரு விஷயம் என்ன?

3. உங்கள் எண்ணங்களை எழுதுங்கள்

நுண்ணறிவுகள் தோன்றும்போது அவற்றைப் பதிவு செய்யுங்கள். ஒரு நாட்குறிப்பு, நோட்புக் பயன்படுத்தவும். ஸ்டீவ் ஜாப்ஸின் பல யோசனைளும் எளிய ஓவியங்களாகத் தொடங்கியவை.

4. தனிமையை பாதுகாக்கவும்

மின்னஞ்சல்கள் அல்லது அன்றாட பணிகள் குறித்த சிந்தனைகளை உள்ளே நுழைய அனுமதிக்காதீர்கள். இது ‘ஓய்வு நேரம்’ அல்ல. இது உங்கள் மிகவும் மதிப்புமிக்க படைப்பு முதலீடாகும்.

சிந்தனையே புதுமைக் கதவுகளை திறக்கிறது

ஸ்டீவ் ஜாப்ஸின் நடைப்பயிற்சிகள் வெறும் நடைகள் அல்ல. இந்த சிந்தனை நேரம் காரணமாக, ஸ்டீவ் ஜாப்ஸால் ஐபாட் உருவாக்கம் போன்ற நம்பமுடியாத லாபகரமான ஐடியாக்களை கொண்டு வர முடிந்தது.

பில் கேட்ஸ் இதேபோன்ற யோசனையை தழுவி தனது ‘திங்க் வீக்ஸ்’-ஐ உருவாக்கினார். அங்கு அவர் ஒரு வாரம் படிக்கவும் சிந்திக்கவும் தன்னைத் தனிமைப்படுத்திக் கொள்வார். ஐன்ஸ்டீன் கூட சிந்தனையைத் தவிர வேறு எந்த திட்டங்களும் இல்லாத நீண்ட தனி நடைப்பயிற்சிகளை மேற்கொள்வார்.

இதன் மூலம் தெரிய வருவது ஒன்றுதான்:

ஆழ்ந்து சிந்திப்பதே புதுமையைத் திறக்கிறது!

‘2 மணி நேர விதி’ ஏன் முக்கியமானது?

இன்றைய காலகட்டத்தில், நமது கவனம் தொடர்ந்து சிதறடிக்கப்படுகிறது. சராசரி நபர் ஒரு நாளைக்கு 100-க்கும் மேற்பட்ட நோட்டிஃபிகேஷன்களை பெறுகிறார். இந்தச் சூழலில், ஆழ்ந்த சிந்தனை அரிதானது மட்டுமல்ல, அது புரட்சிகரமானதும் கூட.

நீங்கள் சிந்திக்க நேரம் ஒதுக்கும்போது, ​​உங்களுக்கு நீங்களே ஒரு போட்டித் தன்மையை உருவாக்குகிறீர்கள். நீங்கள் எதிர்வினையாற்றும் பயன்முறையில் இருந்து வெளியேறி, உண்மையான முன்னேற்றங்கள் நிகழும் படைப்பு மண்டலத்திற்குள் நுழைகிறீர்கள். நீங்கள் ஒரு தொழில்முனைவோராகவோ, படைப்பாற்றல் மிக்கவராகவோ அல்லது நிலைபெற விரும்பும் தொழில்முறை நிபுணராகவோ விரும்பினால் ‘2 மணி நேர விதி’ மிகவும் அவசியமாகும்.

Edited by Induja Raghunathan