ஹோம்

Stock News: ட்ரம்ப்பின் 25% வரி எதிரொலி - ஆட்டம் காணும் இந்திய பங்குச் சந்தை!

இந்தியா மீதான அமெரிக்காவின் வரி விதிப்பு நடவடிக்கையால் மும்பை மற்றும் தேசிய பங்குச் சந்தைகளில் சரிவுப் போக்கு நிலவுகிறது.

12:49:06 pm - Jul 31, 2025 | Jai s

இந்தியாவுக்கு 25 சதவீத இறக்குமதி வரியை அமெரிக்க அதிபர் டொனால்டு ட்ரம்ப் விதித்துள்ளதன் எதிரொலியாக, சென்செக்ஸ் மற்றும் நிஃப்டி புள்ளிகள் வெகுவாக வீழ்ச்சி கண்டுள்ளன.

மும்பை பங்குச் சந்தையில் இன்று (ஜூலை 31) காலை வர்த்தகம் தொடங்கும்போது சென்செக்ஸ் 786.36 புள்ளிகள் சரிந்து 80,695.50 ஆக இருந்தது. அதேவேளையில், தேசிய பங்குச் சந்தையில் நிஃப்டி 212.8 புள்ளிகள் சரிந்து 24,642.25 ஆக இருந்தது.

இந்தியா மீதான அமெரிக்காவின் வரி விதிப்பு நடவடிக்கையால் மும்பை மற்றும் தேசிய பங்குச் சந்தைகளில் சரிவுப் போக்கு நிலவுகிறது. அதேவேளையிலும் இந்துஸ்தான் யூனிலீவர், பவர் கிரிட் கார்ப்பரேஷன், ஐடிசி, நெஸ்லே இந்தியா, டாடா மோட்டார்ஸ், எம் அண்ட் எம்

எடர்னல் லிட், அதானி போர்ட்ஸ் உள்ளிட்ட நிறுவனப் பங்குகள் ஏற்றம் கண்டுள்ளன. வர்த்தக தொடக்கத்தில் கடும் வீழ்ச்சி கண்டாலும், அதன்பின் சற்று மீண்டுள்ளது ஆறுதலுக்குரியது.

இன்று முற்பகல் 11.55 மணியளவில் சென்செக்ஸ் 183.32 புள்ளிகள் சரிந்து 81,298.54 ஆகவும், நிஃப்டி 51.15 புள்ளிகள் சரிந்து 24,803.90 ஆகவும் இருந்தது.

காரணம் என்ன?

அமெரிக்க பங்குச் சந்தை வர்த்தகம் வீழ்ச்சியுடன் நிறைவு பெற்றது. ஆசிய பங்குச் சந்தைகளைப் பொறுத்தவரையில் டோக்கியோவில் மட்டும் ஏற்றம் நிலவுகிறது. சியோல், ஹாங்காங் மற்றும் ஷாங்காங் என அனைத்திலும் சரிவுப் போக்கு நிலவியது. இதுவும் இந்திய பங்குச் சந்தைகளில் எதிரொலிக்கிறது.

இந்தியாவுக்கு 25 சதவீத இறக்குமதி வரியை அமெரிக்க அதிபர் டொனால்டு ட்ரம்ப் அறிவித்துள்ளது, மும்பை மற்றும் தேசிய பங்குச் சந்தைகளை ஆட்டம் காண வைத்துள்ளது. டாலருக்கு நிகரான ரூபாய் மதிப்பும் வரலாறு காணாத அளவில் வீழ்ச்சி கண்டுள்ளது. இதன் தொடர்ச்சியாக, மத்திய அரசு மற்றும் இந்திய ரிசர்வ் வங்கியின் பொருளாதார நடவடிக்கைகளை முதலீட்டாளர்கள் உன்னிப்பாக கவனித்து வருகின்றனர்.