ஹோம்

Gold Rate Chennai: அடுத்தடுத்து அதிர்ச்சி... ரூ.76,000-ஐ நெருங்கும் தங்கம் விலை!

11:27:49 am - Aug 08, 2025 | Jai s

ஆபரணத் தங்கத்தின் விலை இன்றும் வரலாறு காணாத உச்சத்தை தொட்டுள்ளது. அதிர்ச்சி மேல் அதிர்ச்சியாக, சவரன் விலை ரூ.76,000-ஐ நெருங்கியுள்ளது.

சென்னையில் வியாழக்கிழமை சில்லரை விற்பனைச் சந்தையில் 22 காரட் தங்கம் 1 கிராமின் விலை ரூ.20 உயர்ந்து ரூ.9,400 ஆகவும், ஒரு சவரன் விலை ரூ.160 உயர்ந்து ரூ.75,200 ஆகவும் இருந்தது. அதேபோல், 24 காரட் சுத்தத் தங்கம் 1 கிராம் விலை ரூ.22 உயர்ந்து ரூ.10,255 ஆகவும், சவரன் விலை ரூ.176 உயர்ந்து ரூ.82,040 ஆகவும் இருந்தது.

ஆபரணத் தங்கத்தின் விலை கடந்த 4 தினங்களில் மட்டும் ரூ.1,400 அளவில் அதிகரித்துள்ளது. தற்போது, சவரன் விலை ரூ.75,760 ஆக அதிகரித்துள்ளது. இந்த விலை உயர்வு தொடரலாம் என்ற அச்சம் நிலவுகிறது. எனவே, சுப காரியங்களுக்கு அவசியம் எனில் மட்டுமே நகை வாங்கலாம். முதலீடு என்று வரும்போது தனிப்பட்ட ஆலோசனை அவசியம் என்கின்றனர் வர்த்தக நிபுணர்கள். வெள்ளி விலை இன்று மாற்றமின்றி விற்பனை ஆகிறது.

தங்கம் விலை நிலவரம் - வெள்ளிக்கிழமை (8.8.2025):

சென்னையில் இன்று சில்லரை விற்பனைச் சந்தையில் 22 காரட் தங்கம் 1 கிராமின் விலை ரூ.70 உயர்ந்து ரூ.9,470 ஆகவும், ஒரு சவரன் விலை ரூ.560 உயர்ந்து ரூ.75,760 ஆகவும் இருக்கிறது. அதேபோல், 24 காரட் சுத்தத் தங்கம் 1 கிராம் விலை ரூ.76 உயர்ந்து ரூ.10,331 ஆகவும், சவரன் விலை ரூ.608 உயர்ந்து ரூ.82,648 ஆகவும் இருக்கிறது.

வெள்ளி விலை:

சென்னையில் இன்று (8.8.2025) 1 கிராம் வெள்ளி விலை ரூ.127 ஆகவும், ஒரு கிலோ வெள்ளி விலை ரூ.1,27,000 ஆகவும் விற்பனை ஆகிறது.

தங்கம் விலை உயர்வு ஏன்?

சர்வதேச பொருளாதார சூழல், ரூபாய் - டாலர் மதிப்பு உள்ளிட்ட காரணிகளால் தங்கம் விலையில் மாற்றம் ஏற்படுகிறது. இந்தியா மீதான அமெரிக்காவின் 50% வரி விதிப்பால் டாலருக்கு நிகரான ரூபாய் மதிப்பு தொடர்ந்து குறைந்து வருகிறது. இது பெரும் தாக்கத்தை ஏற்படுத்தி வருகிறது. பங்குச் சந்தை சரிவும் கூட பெரிய முதலீட்டாளர்களை பாதுகாப்பு கருதி தங்கம் மீது கவனம் செலுத்த வைத்துள்ளது. இந்த ஆண்டு இறுதிக்குள் தங்கம் விலை ரூ.78,000-ஐ எட்ட வாய்ப்பு உள்ளதாகவும் வர்த்தக நிபுணர்கள் கணித்துள்ளனர்.