ஹோம்

Stock News: சென்செக்ஸ் 500+ புள்ளிகள் வீழ்ச்சி - பல நிறுவன பங்குகள் சரிவு...

வெளிநாட்டு முதலீடுகளின் வரத்து குறைவது உள்ளிட்ட காரணங்களால் இந்திய பங்குச் சந்தை சரிந்துள்ளது. பெரும்பாலான நிறுவனப் பங்குகளும் வீழ்ச்சி கண்டுள்ளன.

01:42:35 pm - Aug 08, 2025 | Jai s

அமெரிக்க வரி விதிப்பு தாக்கத்தால் இந்திய பங்குச் சந்தையில் தொடர்ந்து வீழ்ச்சி நிலவுகிறது. சென்செக்ஸ் 500+ புள்ளிகள் வீழ்ச்சி கண்ட நிலையில், பல்வேறு நிறுவனப் பங்குகளும் சரிந்தன.

மும்பை பங்குச் சந்தையில் இன்று (ஆக.8) காலை வர்த்தகம் தொடங்கும்போது சென்செக்ஸ் 242.24 புள்ளிகள் சரிந்து 80,381.02 ஆக இருந்தது. அதேவேளையில், தேசிய பங்குச் சந்தையில் நிஃப்டி 54.85 புள்ளிகள் சரிந்து 24,541.30 ஆக இருந்தது.

வெளிநாட்டு முதலீடுகளின் வரத்து குறைவது உள்ளிட்ட காரணங்களால் இந்திய பங்குச் சந்தை சரிந்துள்ளது. பெரும்பாலான நிறுவனப் பங்குகளும் வீழ்ச்சி கண்டுள்ளன. அதேவேளையில், என்டிபிசி, டைடன் கம்பெனி, மாருதி சுசுகி, டெக் மஹிந்திரா, ஐடிசி, டிசிஎஸ்,

பஜாஜ் ஃபைனான்ஸ் மற்றும் எடர்னல் லிட் ஆகிய நிறுவனப் பங்குகள் ஏற்றம் கண்டுள்ளன.

இந்திய பங்குச் சந்தையில் ரெட் அலர்ட் தொடரும் நிலையில், இன்று பிற்பகல் 1.15 மணியளவில் சென்செக்ஸ் 523.30 புள்ளிகள் சரிந்து 80,099.96 ஆகவும், நிஃப்டி 152.05 புள்ளிகள் சரிந்து 24,444.10 ஆகவும் இருந்தது.

காரணம் என்ன?

அமெரிக்க பங்குச் சந்தை வர்த்தகம் கலவையான போக்குடன் நிறைவு பெற்றது. ஆசிய பங்குச் சந்தைகளைப் பொறுத்தவரையில் டோக்கியோ மற்றும் ஷாங்காயில் ஏற்றமும், சியோல் மற்றும் ஹாங்காங்கில் வீழ்ச்சியும் நிலவுகிறது. இதுவும் இந்திய பங்குச் சந்தைகளில் எதிரொலிக்கிறது.

இந்திய பொருட்களுக்கு 50% வரி விதிப்பை அமெரிக்க அதிபர் ட்ரம்ப் அறிவித்துள்ளதன் எதிரொலியாக, மும்பை மற்றும் தேசிய பங்குச் சந்தைகளில் தொடர்ந்து பெரும் வீழ்ச்சி நிலவுகிறது. இந்தப் போக்கு அடுத்த வாரம் மாறுமா என்ற எதிர்பார்ப்பு நிலவுகிறது.