இந்தியாவில் ஓபன் ஏஐ-யின் குறியீட்டு உருவாக்கம் (coding) மற்றும் மென்பொருள் பொறியியல் உதவியாளரான Codex பயன்பாடு அதிவேகமாக வளர்ச்சி அடைந்து வருகிறது. 2026 ஆம் ஆண்டின் தொடக்கத்திலிருந்து இந்தியாவில் கோடெக்ஸை வாரந்தோறும் பயன்படுத்தும் செயலியில் உள்ள பயனர்களின் எண்ணிக்கை 27 மடங்கு அதிகரித்துள்ளது.
ஓபன் ஏஐ வெளியிட்ட தகவலின்படி, 2026 ஏப்ரல் மாத இறுதிக்குள் இந்த அமைப்புடனான தினசரி தொடர்புகள் 20 மடங்குக்கும் மேலாக உயர்ந்துள்ளன.
இந்த விரைவான வளர்ச்சி, இந்தியா வெறும் தொழில்நுட்ப நுகர்வோர் நாடாக மட்டுமல்லாமல், செயற்கை நுண்ணறிவு (AI) பயன்பாடு மற்றும் செயல்பாட்டில் உலகளாவிய முக்கிய மையமாக உருவெடுத்து வருவதை வெளிப்படுத்துகிறது.
இயற்கை மொழியை கணினி நிரலாக்கக் குறியீடாக மாற்றும் திறனுக்காக முதலில் உருவாக்கப்பட்ட கோடெக்ஸ் பயன்பாட்டில் இந்தியா தற்போது உலகளவில் முதல் ஐந்து நாடுகளில் ஒன்றாக உள்ளது.
ஆனால், இந்த தொழில்நுட்பத்தின் பயன்பாடு தற்போது மென்பொருள் மேம்பாட்டைத் தாண்டி பல துறைகளுக்கு விரிவடைந்துள்ளதாக தரவுகள் காட்டுகின்றன.
இந்தியாவில் Codex-க்கு வழங்கப்படும் கோரிக்கைகளில் நான்கில் ஒரு பங்கிற்கும் அதிகமானவை தற்போது குறியீட்டு எழுதுதல் தொடர்பானவை அல்ல. பல்வேறு துறைகளில் உள்ள தொழில்முறை நிபுணர்கள் சிக்கலான தகவல்களைச் சுருக்கமாக தொகுக்கவும், அதிகாரப்பூர்வ ஆவணங்களை உருவாக்கவும், அன்றாட ஆய்வு மற்றும் தகவல் சேகரிப்பு பணிகளை தானியக்கமாக்கவும் இந்த தொழில்நுட்பத்தை பயன்படுத்தி வருகின்றனர்.
இதன் மூலம், கோடெக்ஸ் வெறும் நிரலாக்க உதவியாளராக இல்லாமல், பணிச்சூழல் மற்றும் தகவல் பரிமாற்றத்தை திறமையாக ஒழுங்குபடுத்த உதவும் பொதுப் பயன்பாட்டு செயற்கை நுண்ணறிவு உதவியாளராக மாறி வருவதை காண முடிகிறது.
ஓபன் ஏஐ நிறுவனத்தின் ஆசியா-பசிபிக் பிராந்திய ஸ்டார்ட்அப் பிரிவின் தலைவரான தாமஸ் ஜெங், இந்தியாவின் வலுவான "builder culture" இந்த வளர்ச்சிக்கான முக்கிய காரணியாக இருப்பதாக தெரிவித்தார். அவர் கூறுகையில்,
“இந்தியாவைப் பற்றிய மிகவும் உற்சாகமான விஷயம் என்னவென்றால், இந்த தொழில்நுட்பத்தின் பயன்பாடு மென்பொருள் பொறியாளர்களிடம் மட்டும் நடைபெறவில்லை. நிறுவனர்களும், செயல்பாட்டு நிர்வாகிகளும், ஆராய்ச்சியாளர்களும், மாணவர்களும், வணிகக் குழுக்களும் தங்களுடைய யோசனைகளை வேகமாக செயல்படுத்தக்கூடிய முடிவுகளாக மாற்றுவதற்காக கோடெக்ஸை அதிகளவில் பயன்படுத்தி வருகின்றனர்,” என்றார்.
இந்த வளர்ச்சி திடீரென ஏற்பட்ட ஒன்றல்ல. இந்த ஆண்டின் தொடக்கத்திலிருந்தே அதிக அளவிலான பயன்பாடு பதிவாகி வந்தது. பிப்ரவரி மாத ஆய்வொன்றில், இந்தியாவில் கொடெக்ஸின் குறியீட்டு பயன்பாடு உலக சராசரியை விட மூன்று மடங்கு அதிகமாக இருந்தது கண்டறியப்பட்டது.
இந்த வளர்ச்சிக்கு இந்தியாவின் பெருநிறுவன சூழலும் ஆதரவளித்து வருகிறது. டிசிஎஸ் மற்றும் இன்ஃபோசிஸ் போன்ற பெரிய நிறுவனங்கள் தங்களது பொறியியல் மற்றும் நிறுவன செயல்முறைகளில் இந்த செயற்கை நுண்ணறிவுத் திறன்களை ஒருங்கிணைக்க ஒத்துழைப்புகளை மேற்கொண்டுள்ளன. அதேபோல், ‘ரேஸர் பே’ நிறுவனமும் தனது செயல்பாடுகளை மேம்படுத்த இந்த தொழில்நுட்பத்தை ஏற்றுக்கொண்டுள்ளது.
இந்தியாவின் தொழில்நுட்பத் திறன்கள், புதுமை உருவாக்கும் மனப்பான்மை மற்றும் ஏஐ கருவிகளை விரைவாக ஏற்றுக்கொள்ளும் சூழல் ஆகியவை, உலகளாவிய செயற்கை நுண்ணறிவு புரட்சியில் நாட்டை முன்னணி இடத்துக்கு கொண்டு செல்லும் முக்கிய சக்திகளாக மாறி வருகின்றன.
