ஹோம்

Stock News: இந்திய பங்குச் சந்தையில் ‘மீட்சி’ அறிகுறிகள் - காரணம் என்ன?

அமெரிக்க டாலருக்கு நிகரான ரூபாய் மதிப்பு கடுமையாக வீழ்ச்சி கண்டிருப்பது, வெளிநாட்டு முதலீடுகளின் வரத்து குறைந்தது உள்ளிட்டவை பங்குச் சந்தை வர்த்தகத்தில் தாக்கத்தை ஏற்படுத்தி வருகின்றன.

01:35:58 pm - Dec 04, 2025 | Jai s

முதலீட்டாளர்கள் தங்களது பங்குகளை விற்பதில் ஆர்வம் காட்டி வருவதால், நான்காவது நாளாக இந்திய பங்குச் சந்தையில் தடுமாற்றம் நிலவிலானும், தற்போது மீட்சிக்கான அறிகுறிகள் தென்படுகின்றன.

மும்பை பங்குச் சந்தையில் இன்று (டிச.4) காலை வர்த்தகம் தொடங்கும்போது சென்செக்ஸ் 156.83 புள்ளிகள் சரிந்து 84,949.98 ஆக இருந்தது. அதேவேளையில், தேசிய பங்குச் சந்தையில் நிஃப்டி 47 புள்ளிகள் சரிந்து 25,938.95 ஆக இருந்தது. பின்னர், மீட்சிப் போக்கு நிலவியது.

அமெரிக்க டாலருக்கு நிகரான ரூபாய் மதிப்பு கடுமையாக வீழ்ச்சி கண்டிருப்பது, வெளிநாட்டு முதலீடுகளின் வரத்து குறைந்தது உள்ளிட்டவை பங்குச் சந்தை வர்த்தகத்தில் தாக்கத்தை ஏற்படுத்தி வருகின்றன. எனினும், இந்திய ரிசர்வ் வங்கி உரிய நடவடிக்கைகளை எடுக்கும் என்ற நம்பிக்கை மேலோங்கி இருப்பதாக வர்த்தக நிபுணர்கள் கூறினர்.

மும்பை பங்குச் சந்தையில் இன்றைய வர்த்தகத்தில் அதானி போர்ட்ஸ், ரிலையன்ஸ் இண்டஸ்ட்ரீஸ், டாடா ஸ்டீல், எல் அண்ட் டி, பஜாஜ் ஃபின்சர்வ் உள்ளிட்ட நிறுவனப் பங்குகள் ஏற்றம் கண்டிருந்தன. என்டிபிசி, டாடா மோட்டார்ஸ், பாரதி ஏர்டெல், ஹெச்டிஎஃப்சி பேங்க், எஸ்பிஐ உள்ளிட்ட நிறுவனப் பங்குகள் சரிவை சந்தித்தன.

இன்று பிற்பகல் 12.20 மணியளவில் சென்செக்ஸ் 73.12 புள்ளிகள் உயர்ந்து 85,179.93 ஆகவும், நிஃப்டி 33.45 புள்ளிகள் உயர்ந்து 26,019.45 ஆகவும் இருந்தது.

காரணம் என்ன?

அமெரிக்க பங்குச் சந்தை ஏற்றத்துடன் நிறைவு பெற்றது. ஆசிய பங்குச் சந்தைகளைப் பொறுத்தவரையில் தற்போது தென் கொரியாவில் மட்டும் சரிவு நிலவுகிறது; ஜப்பான், ஹாங்காங் மற்றும் ஷாங்காயில் ஏற்றம் நிலவுகிறது. அமெரிக்க டாலருக்கு நிகரான ரூபாய் மதிப்பு கடுமையாக வீழ்ச்சி கண்டிருப்பது, வெளிநாட்டு முதலீடுகளின் வரத்து குறைந்தது உள்ளிட்டவை இந்திய பங்குச் சந்தை வர்த்தகத்தில் தாக்கத்தை ஏற்படுத்தி வருகின்றன.