நாடு முழுவதும் ஆதார் அடையாள முறைமை அதிகப்படியான பாதுகாப்பு, தனியுரிமை மற்றும் வசதிகளை நோக்கி நகரும் நிலையில், யூனிக் ஐடென்டிபிகேஷன் அத்தாரிட்டி ஆப் இந்தியா (UIDAI) விரைவில் புதிய ஆதார் செயலியை அறிமுகப்படுத்தத் திட்டமிட்டுள்ளது.
இந்த ஆப் காகிதமற்ற அடையாள பகிர்வை எளிதாக்குவதுடன், ஆதார் விவரங்களை முழுமையாகவோ அல்லது தேர்வுசெய்த சில தகவல்களை மட்டுமேவோ பகிரும் வசதியையும் வழங்கும், என அதிகாரப்பூர்வ அறிவிப்பில் தெரிவிக்கப்பட்டுள்ளது.
இதற்கு முன்பு இருந்த mAadhaar செயலி, ஆதார் கார்டைப் பார்ப்பது, இ-ஆதார் பதிவிறக்கம் செய்வது அல்லது விர்ச்சுவல் ஐடி உருவாக்குவது போன்ற அடிப்படை வசதிகளை மட்டுமே வழங்கியது.ஆனால், இந்தப் புதிய ஆதார் செயலி அதைவிட மேம்பட்ட அம்சங்கள் கொண்டது.
புதிய ஆதார் செயலி தற்போது சோதனை கட்டத்தில் உள்ளது, ஆனால் பயனர்கள் அதை கூகிள் பிளே ஸ்டோர் மற்றும் ஆப்பிள் ஆப் ஸ்டோரில் பதிவிறக்கம் செய்து அரசின் இறுதி வெளியீட்டிற்கு முன் கருத்துக்களை வழங்கலாம் என்று கூறப்பட்டுள்ளது.
மேலும் இந்த செயலியை ஆரம்பத்தில் பயன்படுத்தும் பயனாளர்கள் பயன்படுத்தும் போது ஏதேனும் சிக்கல்களை எதிர்கொண்டால் தங்கள் கருத்தை feedback.app@uidai.net.in என்ற முகவரியில் அவர்கள் தெரிவிக்கலாம்.
சமீபத்தில், “ஆதார் செயலியை பயன்படுத்தி ஆஃப்லைன் சரிபார்ப்பு” என்ற தலைப்பில் யூஐடிஏஐ நடத்திய வலைத்தளக் கருத்தரங்கில் பல துறைகளைச் சேர்ந்த 250-க்கும் மேற்பட்ட நிறுவனங்களும் நிபுணர்களும் பங்கேற்றனர். இது புதிய செயலியின் அறிமுகத்திற்கான முன்னோட்டமாகக் கருதப்படுகிறது.
2010-ல் தொடங்கிய ஆதார் திட்டம் தற்போது 1.3 பில்லியன் அடையாளக்காரர்களுடன் உலகின் மிகப்பெரிய டிஜிட்டல் அடையாள அமைப்புகளில் ஒன்றாக திகழ்கிறது.
புதிய ஆதார் செயலியின் சிறப்பம்சங்கள்:
UIDAI தகவலின்படி, புதிய ஆப் வெளியான பிறகு ஆதார் வைத்திருப்பவர்கள் பல புதிய நன்மைகளை பெறவுள்ளனர்:
- ஒரே ஆப்பில் ஐந்து குடும்பத்தினரின் ஆதார் விவரங்களை சேமிக்கும் வசதி
- எந்த விவரங்களைப் பகிர வேண்டும் என்பதை பயனர் தானே தேர்வு செய்யும் முழு கட்டுப்பாடு
- முழு ஆதார் தகவலையோ அல்லது தேவையான தேர்வு செய்யப்பட்ட தகவல்களையோ பகிரும் விருப்பம்
- ஒரே கிளிக்கில் பயோமெட்ரிக் லாக்/அன்லாக் செய்யும் பாதுகாப்பு வசதி
- மொபைல் எண், முகவரி போன்றவற்றை எளிதில் ஆன்லைனில் புதுப்பிக்கும் வாய்ப்பு
இந்த ஆப் அறிமுகமான பிறகு, தற்போது பல்வேறு தளங்களில் பிளவுபட்டு இருக்கும் சேவைகள்—இருப்பு புதுப்பிப்பு போர்டல்கள், ஆஃப்லைன் XML பதிவிறக்கம் போன்றவை—ஒன்றிணைந்த ஒரே இண்டர்ஃபேஸில் கிடைக்கவிருக்கின்றன.
UIDAI தலைமைச் செயலாளர் புவனேஷ் குமார் வலியுறுத்தியதாவது,
புதிய ஆப் மற்றும் அதன் துணை தொழில்நுட்பங்கள் ஆஃப்லைன் சரிபார்ப்பை ஊக்குவித்து, பயனர்களின் தனியுரிமையை பாதுகாக்கும் வல்லமை பெற்றவை. ஆதார் நகல்களில் ஏற்படும் போலிச்செயல் அபாயங்களை இது குறைக்கும், என்றார்.
ஆதார் சட்டத்தின்படி, ஆஃப்லைன் சரிபார்ப்பு செல்லுபடியாகும், ஆனால் ஆதார் எண் அல்லது பயோமெட்ரிக் விவரங்கள் சேகரிப்பு, பயன்படுத்தல், சேமிப்பு போன்றவை கட்டுப்பாட்டிற்குட்பட்டவை. இந்த புதிய ஆப், ஆதார் எண்ணையே கேட்காமல் சரிபார்ப்பை மேற்கொள்ளும் ஒரு சட்டபூர்வமான முறையாக அமையும்.
புதிய ஆப்பின் வெளியீட்டு தேதி இதுவரை அறிவிக்கப்படவில்லை என்றாலும், இது ஆதார் பயன்பாட்டில் பெரும் மாற்றத்தை ஏற்படுத்தும் என எதிர்பார்க்கப்படுகிறது.
