ஹோம்

Stock News: இந்திய பங்குச் சந்தையில் உயர்வுக்குப் பின் தடுமாற்றம் ஏன்?

‘இன்று காலை வர்த்தகம் பாசிட்டிவாக தொடங்கினாலும் கூட, சர்வதேச சந்தைகளில் நிலவும் பாதகமான போக்கின் தாக்கத்தாலும், வெளிநாட்டு முதலீடுகளின் வரத்து குறைவாலும் சென்செக்ஸ் மற்றும் நிஃப்டி புள்ளிகள் சரிவுக்குத் திரும்பின’ என்று வர்த்தக நிபுணர்கள் கூறினர்.

02:55:18 pm - Dec 10, 2025 | Jai s

இன்றைய வர்த்தக தொடக்கத்தில் வெகுவாக மீண்ட இந்திய பங்குச் சந்தை பின்னர் மீண்டும் சரிவைச் சந்திக்கத் தொடங்கியது. மூன்றாவது நாளாக சென்செக்ஸ் மற்றும் நிஃப்டி புள்ளிகள் தடுமாற்றம் கண்டுள்ளன.

மும்பை பங்குச் சந்தையில் இன்று (டிச.10) காலை வர்த்தகம் தொடங்கும்போது சென்செக்ஸ் 259.31 புள்ளிகள் உயர்ந்து 84,925.59 ஆக இருந்தது. அதேவேளையில், தேசிய பங்குச் சந்தையில் நிஃப்டி 64.65 புள்ளிகள் உயர்ந்து 25,904.30 ஆக இருந்தது.

‘இன்று காலை வர்த்தகம் பாசிட்டிவாக தொடங்கினாலும் கூட, சர்வதேச சந்தைகளில் நிலவும் பாதகமான போக்கின் தாக்கத்தாலும், வெளிநாட்டு முதலீடுகளின் வரத்து குறைவாலும் சென்செக்ஸ் மற்றும் நிஃப்டி புள்ளிகள் சரிவுக்குத் திரும்பின,’ என்று வர்த்தக நிபுணர்கள் கூறினர்.

மும்பை பங்குச் சந்தையில் இன்றைய வர்த்தகத்தில் டாடா ஸ்டீல், அதானி போர்ட்ஸ், எனடிபிசி, எல்அண்ட்டி, ஐடிசி உள்ளிட்ட நிறுவனப் பங்குகள் ஏற்றமும், இண்டஸ்இண்ட் பேங்க், ஆக்சிஸ் பேங்க், எஸ்பிஐ, நெஸ்லே இந்தியா, பாரதி ஏடெல், டிசிஎஸ், இன்போசிஸ் உள்ளிட்ட நிறுவனப் பங்குகள் சரிவும் சந்தித்தன.

இன்று பிற்பகல் 1.45 மணியளவில் சென்செக்ஸ் 28.64 புள்ளிகள் சரிந்து 84,637.64 ஆகவும், நிஃப்டி 1.70 புள்ளிகள் சரிந்து 25,837.95 ஆகவும் இருந்தது.

காரணம் என்ன?

அமெரிக்க பங்குச் சந்தை வர்த்தகம் சரிவுடன் நிறைவுற்றது. ஆசிய பங்குச் சந்தைகளைப் பொறுத்தவரையில் தற்போது தென் கொரியாவில் மட்டும் ஏற்றம் நிலவுகிறது; ஜப்பான், ஷாங்காய், ஹாங்காங்கில் சரிவு காணப்படுகிறது. சர்வதேச சந்தைகளில் நிலவும் பாதகமான போக்கின் தாக்கத்தாலும், வெளிநாட்டு முதலீடுகளின் வரத்து குறைவாலும் சென்செக்ஸ் மற்றும் நிஃப்டி புள்ளிகள் தொடர்ந்து சரிந்து வருகின்றன